6+

Wie woon in die diep en donker bos?’ wou almal weet. Saam met Babalela is daar ook ander bosbewoners. Daar is Wrrrumpie, die haastige en lastige wurm; die humeurige Knortand wat na almal hap met sy skerp tande; Potifant met sy reuse pote, wat kyk waar hy trap, maar nie altyd trap waar hy kyk nie; die nuuskierige Meermoskat; die agt Fripperwakkies wat nie vir ‘n oomblik ophou kwetter nie en natuurlik  Babalela, die enigste een wat al ooit ‘n avontuur buite die bos beleef het. Maar nie vir lank nie … Die ander bosbewoners is vasbeslote om ook die wye wêreld buite die bos te gaan verken. Hulle hou egter nie rekening met al die gevare wat in die stad op hulle wag nie, en kort voor lank is al die bosdiere toegespyker in kratte. Sal die Babalela hulle uit hierdie verknorsing kan red?

In die vierde Babalela-avontuur skrik die Babalela hom yskoud toe daar op ‘n dag ‘n nare gerammel in die bos is. Hy kan nie glo wat hy sien nie. Aan die rand van die bos dreun en grom ‘n reuse-stootskraper. Soos ‘n kwaai bul loop die stootskraper ‘n klomp bome storm. Die bome knak en val. Oral lê daar bome en bosse rond wat die stootskraper omgeruk het. As die Babalela en sy maats, Wrrrumpie, Meermoskat, Potifant, Knortand en die agt Fripperwakkies, nie vinnig ‘n plan maak nie, gaan daar niks van hul geliefde bos oorbly nie!